وہ پہلا مقدر ساز ٹماٹر کس نے پھینکا جس سے 'لا توماتینا' کے انقلاب کا آغاز ہوا؟ حقیقت یہ ہے کہ کوئی نہیں جانتا۔ شاید وہ فرانکو کے خلاف اٹھنے والی بغاوت تھی، یا پھر کوئی میلا جو بے قابو ہو گیا۔ اس واقعہ کی مشہور ترین روایت کے مطابق، 1945 کے میلہ 'لوس جیگانتیس' (پیپر ماشے سے بنے دیو ہیکل کاغذی پتلوں کی پریڈ ) کے دوران، مقامی لوگوں کا ارادہ تھا کہ اپنی جانب کچھ توجہ مبذول کرانے کے لیے جھگڑا ڈالنے کا ڈھونگ رچائیں۔ انہیں قریب ہی سبزی فروش کا ٹھیلا نظر آیا اور انہوں نے پکے ہوئے ٹماٹروں سے نشانہ بازی شروع کر دی۔ راہ میں کھڑے غیر متعلق تماشبین بھی شامل ہو گئے یہاں تک کہ اس منظر نے دائیں بائیں اڑتے پھلوں کے ایک بھرپور دنگل کی صورت اختیار کر لی۔ جھگڑا چھیڑنے والوں کو ٹماٹر فروشوں کا معاوضہ بھرنا پڑا مگر یہ جرمانہ نہ تو ٹماٹر بازی پر مبنی مزید جھڑپوں کو روکنے میں مانع ہو سکا، اور نہ ہی ایک نئی روایت کے قیام میں۔

جھگڑوں کے بڑھنے اور بےقابو ہو جانے کے خوف سے حکام نے 1950 کے عشرے میں اس سرگرمی کو ممنوع قرار دینے کے سلسلہ وار قوانین پہلے نافذ کیے، پھر ان میں نرمی کی، اور پھر دوبارہ عائد کر دیے۔ سنہ 1951 میں اس قانون کی خلاف ورزی کرنے والے مقامی لوگوں کو جیل بند کر دیا گیا یہاں تک کہ عوام کی جانب سے ہونے والے پرزور احتجاج میں ان کی رہائی کا مطالبہ ہوا۔ ٹماٹر ممنوع قرار دیے جانے کے قانون کی دیدہ دلیرانہ تضہیک کا سب سے مشہور واقعہ 1957 میں پیش آیا جب اس کے حمایتیوں نے ٹماٹر کی آخری رسوم رچائیں جس میں تابوت اور جلوس سمیت باقاعدہ جنازہ نکالا گیا۔ سنہ 1957 کے بعد مقامی حکومت نے حالات سے سمجھوتے کا فیصلہ کر لیا، کچھ قواعد نافذ کیے، اور اس بے سروپا سی رسم کو اپنا لیا۔

اگرچہ یہ جشن ٹماٹروں کے گرد ہی گھومتا ہے، تاہم اس انجام خیز تصادم سے ماقبل ایک ہفتہ رونق میلہ جاری رہتا ہے۔ سڑکوں پر نکلنے والی پریڈوں، موسیقی، اور آتشبازی کے ساتھ، پرمسرت ہسپانوی رواج کے مطابق یہاں بونیول کے روحانی محافظوں، مریم عذرا ]ورجن میری[ اور سینٹ لووی برٹرینڈ، کی تقریبات منائی جاتی ہیں۔ عنقریب وارد دھینگا مشتی کے لیے طاقت جمع کرنے کی خاطر جنگ سے ایک شام قبل نہایت ہی شاندار پائیلا ]ہسپانوی پلاؤ[ کا اہتمام ہوتا ہے، جس میں چاول، سمندری جانوروں، زعفران، اور زیتون کے تیل پر مبنی بلنسیہ کا ایک معروف روایتی کھانا سجا کر پیش کیا جاتا ہے۔

یہ آزاد طبع میلہ آجکل کسی قدر نظم و ضبط کے دائرے میں ہے۔ منتظمین نے اس سالانہ موقع پر کاشت کے لیے ٹماٹروں کی ایک خاص بدزائقہ نسل تک تیار کر ڈالی ہے۔ جشن کی تقریبات کا آغاز صبح 10 بجے ہوتا ہے جب شرکاء دوڑ لگا کر چکنائی لگے کھمبے پر ٹنگی ہیم (خاص طریقے سے تیار کردہ سور کی ران) ہتھیانے کی کوشش کرتے ہیں۔ تماشائی سڑکوں پر ناچتے گاتے ہوئے اس تگ و دو میں حصہ لینے والوں کو پانی کی دھاروں سے بھگو ڈالتے ہیں۔ جب گرجے کا گھنٹا بارہ بجنے کا اعلان کرتا ہے تو "ٹوماٹے (ٹماٹر)، ٹوماٹے!" کے بلند سے بلند تر ہوتے نعروں میں ٹماٹروں سے لدے ٹرک شہر میں داخل ہوتے ہیں۔

پھر پانی کی توپ کی سلامی کے ساتھ اصل پروگرام کا آغاز ہوتا ہے۔ یہ اس بات کی ہری جھنڈی ہے کہ ٹماٹر کچل کر ساتھی شرکاء پر مکمل طور سے ہلا بول دیا جائے۔ فاصلے پر رہ کر ٹماٹر پھینکنے والے، آمنے سامنے وار کرنے والے، یا درمیانے فاصلے سے آنکڑے نشانے لگانے والے – آپ کا طریقہ کار چاہے کچھ بھی ہو، اس واردات کے اختتام تک آپ کافی مختلف لگیں (اور محسوس کریں) گے۔ قریبًا ایک گھنٹہ بعد ٹماٹروں میں بھیگے نشانہ باز سڑک پر کچلے کچومر کے سمندر میں کھیل رہے ہوتے ہیں اور ٹماٹر نما کوئی شے دکھائی نہیں دیتی۔ توپ ایک مرتبہ پھر داغی جاتی ہے جو جنگ کے خاتمے کا اعلان ہوتا ہے۔